Вольга Гапеева. Я збіраюся на вайну

я збіраюся на вайну
кожную раніцу
чышчу боты ― рыхтую зброю
ПОТЫМ
мы будзем кахаць потым
а зараз няма калі
я збіраюся на вайну
чышчу боты ― рыхтую зброю
хочаш ― цалуй мае вочы
пакуль не баляць яны
ад калючага дроту
жабкай станецца хто-небудзь іншы
а мне няма калі
я збіраюся на вайну
чышчу боты ― рыхтую зброю
заўтра птушкі скінуць па крыльцы ―
гэта звычайны прагноз надвор’я
ну што ты паціскаеш плячыма
я ― немагчыма